Austrheim heldt seg til nasjonale Korona-krav

Kommunal kriseleiing (KKL) i Austrheim bestemte måndag morgon at kommunen gjer som Bergen og Alver, og no avsluttar perioden med tiltak strengare enn dei nasjonale. 

Det betyr at den lokale forskrifta om Korona-tiltak i Austrheim vert oppheva frå måndag 7. desember klokka 10.00.

Den siste månaden har det i deler av landet, som rundt Bergen og Oslo, vore innført strengare tiltak på grunn av at smittepresset her har vore høgare enn andre stader i landet. No går smittetala nedover i Bergen, og det er grunnlaget for at byen og kommunane rundt kan løysa opp på tiltaka. 

På nettsida til Regjeringa finn du ein plakat for dei nasjonale tiltaka, sjå regjeringen.no:

Dei nasjonale Korona-tiltaka:

Det aller viktigaste:

• Hald avstand.
• Hald hendene reine, med handvask eller handsprit.
• Hald deg heime dersom du er sjuk, og ikkje send born i barnehage eller skule dersom dei har fått symptom på luftvegssjukdom.
• Hald nede talet på personar du møter.
• Ha mål om to meters avstand, så er det lettare å klara minst ein.
• Om det er utfordrande å halda avstand - bruk munnnbind (men for born under 12 år er ikkje munnbind tilrådd).
• Skal ein klara å oppretthalda dette tiltaksnivået, er det viktig at alle er nøye med å etterleva råd og reglar. Vaksinering kan starta tidleg i 2021, men det vil ta tid før ein får effekt.

I private heimar, og sosial kontakt:

• Det er tilråding om å ha maksimalt 5 gjester i tillegg til dei du bur saman med. Er alle gjestene frå same husstand, kan ein vera fleire.
• Barnehagebarn og barneskulebarn kan vera saman med sin kohort også på fritida.
• Unge og vaksne som veit at dei har vore i situasjonar der dei ikkje har klart å halda minst ein meters avstand, bør ha minst to meters avstand dersom dei besøker personar i risikogruppene.

Besøk på Nordliheimen:

• Ta kontakt med Nordliheimen for å få vita om kva som gjeld. Alle besøk skal avtalast på førehand.

Reiser i utland og innland:

• Reisekarantene: Kjem du til Norge frå eit land eller område i EØS/Sveits som er definert som raudt, eller eit land utanfor EØS/Sveits, skal du i reisekarantene i 10 døgn. Sjå reglar om reisekarantene her, hjå Helsenorge.no.
• Det er påbudt å bruka munnbind på vei til karantenestad. Sjå meir om bruk av munnbind her, hjå Helsenorge.no.
• Krav om negativ koronatest ved ankomst til Norge: Utanlandske reisande til Norge må ved innreise visa dokumentasjon på negativ koronatest. Testen må vera tatt innan 72 timer før innreise. Sjå meir om kravet her, hjå Helsenorge.no.
• Karantenehotell: Personar som ikkje er busette (registrert i folkeregisteret) eller ikkje eig bustad i Norge, skal gjennomføra karantenen på karantenehotell. Sjå meir om karantenehotell her, hjå Helsenorge.no.
  
• Nokre grupper reisande kan få unntak frå reisekarantene på fritida eller berre i arbeidstida. Sjå meir om unntak frå karantene her, hjå Helsenorge.no.
• Unngå unødvendige reiser innanlands: Dette gjeld ikkje arbeidsreiser eller reiser til fritidseigedommar som kan gjennomførast utan kontakt med andre.

Karantene og isolasjon:

• Smittekarantene: Har du vore i kontakt med ein stadfesta smitta person, skal du i karantene i 10 døgn frå den dagen kontakten med smitta person skjedde. Sjå reglar om smittekarantene her, hjå Helsenorge.no.
• Isolasjon: Du skal isolerast dersom du har fått påvist covid-19 eller er i smittekarantene og utviklar symptom. Sjå reglar om isolasjon her, hjå Helsenorge.no.

Kollektivreiser:

• Ha minst ein meters avstand.
• Unngå å reisa i rushtida.
• Både på buss og i drosje bør ein bruka munnbind, særleg om det er vanskeleg å halda avstand.
• Etter avtale med arbeidsgjevar kan heimekontor vera ei løysing for å redusera smitterisikoen.

Arrangementer og samankomstar

• Maks 20 deltakarar på privat samankomst når dette skjer på offentleg stad i leigde eller lånte lokale.
• Maks 50 deltakarar på offentleg arrangement, utan fastmonterte sete.
• Maks 200 deltakarar på offentlege arrangement med fastmonterte sete innandørs.
• Maks 600 deltakarar på offentlege arrangement med fastmonterte sete, utandørs.
• Det er i tillegg krav om ein meters avstand mellom deltakarane, oppnemning av ansvarleg arrangør og registrering av gjester. Austrheim kommune har eit eige skjema for slik registrering, sjå på denne lenka:
  Les elles meir om arrangement og samankomstar hjå Helsenorge.no: 
• Serveringsstader: Desse kan halda ope, men må følgja reglar om skjenkestopp ved midnatt, og kan ikkje sleppa inn nye gjester etter 22.00. Vidare er det reglar om avstand og registrering, og Austrheim kommune har eit eige skjema for registrering, sjå på denne lenka:
  Sjå meir om reglane for serveringsstader hjå Helsenorge.no.
• Idretts- og fritidsaktivitetar: Barn og unge under 20 år har unntak frå regelen om 1 meters avstand, og kan nytta felles utstyr på treningane.